是次演嘢會，王祖藍將會以「愛」作為主題，誓言再度絞盡腦汁、毫無保留、傾盡全力、有愛話愛、有情講情，徹底玩盡初戀、熱戀、失戀、明戀、暗戀、痴戀、求婚、結婚…更會將自己完完全全擺上檯，盡地一鋪，任玩唔嬲，務求施展渾身解數，保証分分鐘有血有汗，秒秒鐘有笑有淚，絕對係挑戰個人舞台演出極限！談到會否邀請嘉賓，祖藍則大賣關子：「而家Call緊親朋密友做嘉賓，有『女』有『男』，總之嚟得嘅都有驚喜！我仲會隨時會拉埋觀眾上台，同我一齊Totally Show Off！」
另外，是次演嘢會的宣傳海報，比去年亦玩得更癲更喪更盡！是次祖藍不再以女裝出場，改以滿面鬍鬚、頭戴荊棘的超爆笑造型，扮成史上最Man最好玩的救世主，眼角配上極度誇張的大滴眼淚，然後擘大口高呼：「我要嫁俾耶穌！」，創意爆燈，非常搞鬼之餘，更代表是次演嘢將會再度在今年暑假，為全港觀眾帶來一場笑中有淚、有玩嘢、有內涵的心靈褔音！
總之，王祖藍將會繼續發揮「咪咁扮嘢」精神，盡情扮鬼扮馬、扮哩扮嚕、扮男扮女、扮笑扮喊！一場祖藍獨門超扮嘢演嘢會，《王祖藍Show Off Show咪咁扮嘢演嘢會II》，勢必成為今個暑假全城最爆最喪話題作！
